Այն մասին, թե ինչպես հրահրվեց 44-օրյա պատերազմը. 10 փաստ
168TV-ի «Ռեվյու» հաղորդաշարի եթերում ռազմական փորձագետ Հայկ Նահապետյանը հայտարարել է, որ Նիկոլ Փաշինյանը պետք է պատասխանատվության ենթարկվի՝ ՀՀ Ազգային ժողովի 44-օրյա պատերազմի հանգամանքները քննող հանձնաժողովի եզրակացության հիման վրա:
«Եթե այդ հանձնաժողովն իսկապես մասնագիտական լուրջ քննության է ենթարկել 44 օրյա պատերազմը, ապա նվազագույնը Հայաստանի Հանրապետության ռազմաքաղաքական ղեկավարությունից մի քանի հարյուր հոգի՝ Փաշինյան Նիկոլի ղեկավարությամբ, պետք է հայտնվեին ուղղիչ աշխատանքային գաղութում»,- ասել է Նահապետյանը:
Հայկ Նահապետյանը ներկայացրել է Հայաստանի իշխանությունների կանխամտածված գործողությունները հաստատող 10 փաստ, որոնք հանգեցրին 44-օրյա պատերազմի.
- 2016 թվականի Ապրիլյան պատերազմից հետո, որը բացահայտեց Հայաստանի հակաօդային պաշտպանության խոցելիությունը, որոշում կայացվեց Ռուսաստանից ստացված 300 միլիոն դոլարի վարկն օգտագործել՝ ՀՕՊ անհրաժեշտ միջոցներ ձեռք բերելու նպատակով, այդ թվում՝ անօդաչու թռչող սարքերի դեմ պայքարելու համար նախատեսվում էր ձեռքբերել «Կրասուխա» ռադիոէլեկտրոնային պայքարի համակարգեր և «Պանցիր» զենիթահրթիռային համալիրներ: Նիկոլ Փաշինյանի իշխանության գալուց հետո այդ պայմանագիրը չեղարկվել է:
- Անարդյունավետ զենքի ձեռքբերում Հայաստանի բյուջեի հաշվին, մասնավորապես՝ Սու-30 կործանիչների՝ առանց սպառազինության։
- 2018 թվականից ի վեր Նիկոլ Փաշինյանի զուգընկեր Աննա Հակոբյանը պետական մակարդակով իրականացնում էր քարոզչություն՝ պնդելով, որ մեր տղաները զոհվել են հանուն ոչնչի, որն ուղղակիորեն բացասաբար է անդրադարձել զինված ուժերի մարտական ոգու վրա։
- Նիկոլ Փաշինյանը հրապարակավ հայտարարեց, որ առնվազն մի քանի օր առաջ ինքը տեղյակ է եղել մոտալուտ պատերազմի մասին: Սա նշանակում էր, որ Հայաստանի զինված ուժերի և Արցախի պաշտպանության բանակի ստորաբաժանումները պետք է դուրս գային իրենց մշտական տեղակայման վայրից։ Սակայն, դա տեղի չունեցավ։
- 2020 թվականի սեպտեմբերի 1-ին Հայաստանը ստացավ հրամանատարաշտաբային զորավարժություններ անցկացնելու առաջարկ՝ Ռուսաստանի Անվտանգության խորհրդի քարտուղար Պատրուշևի ստորագրությամբ: Զորավարժությունների սցենարի համաձայն՝ Ադրբեջանի տարածքում են գտնվում Սիրիայից, Լիբիայից և Թուրքիայից տասնյակ հազարավոր ահաբեկիչներ, ինչպես նաև թուրքական ռազմաօդային ուժերի F-15 կործանիչներ: Նշվում էր հակառակորդի հիմնական հարվածային ուղղությունները: Սակայն առաջարկը չընդունվեց Հայաստանի իշխանությունների կողմից:
- Պատերազմից երկու ամիս առաջ իշխող կուսակցության խմբակցության ղեկավար Լիլիթ Մակունցը հրապարակավ վստահեցրեց, որ Ադրբեջանի հետ պատերազմի դեպքում Թուրքիան որևէ կերպ չի մասնակցի։
- Պատերազմի սկսվելու օրը Հայաստանի պաշտպանության նախարարը երկրում չէր գտնվում։
- Պատերազմից առաջ լուծարվեցին 5 ռեզերվային հրաձգային և մոտոհրաձգային գնդեր, որոնք պատրաստ էին պատերազմի ընթացքում համալրել գործող զորամասերը։
- Նիկոլ Փաշինյանը Հայաստանի ռազմավարական դաշնակցի ղեկավարության հետ կապ հաստատեց պատերազմի սկսվելուց ընդամենը 11 օր անց։
- 2020 թվականի հոկտեմբերի 19-ին Նիկոլ Փաշինյանը մերժեց որոշակի պայմաններում ռազմական գործողությունները դադարեցնելու Ռուսաստանի նախագահի առաջարկը: Սա այն դեպքում, երբ պատերազմի սկսվելուց մեկ շաբաթ անց Հայաստանի Գլխավոր շտաբի պետ Օնիկ Գասպարյանն Անվտանգության խորհրդի նիստում իր զեկույցում նշել էր, որ պատերազմը պետք է դադարեցվի, քանի որ Հայաստանի պարտության հավանականությունը մեծ է։
Մանրամասները դիտեք տեսանյութում․
Ավելի վաղ Հայաստանի Հանրային տրիբունալը հրապարակել էր Նիկոլ Փաշինյանի հրապարակային ելույթների հետահայաց տեսաժամանակագրությունը, որը վկայում էր նրա նպատակաուղղված սադրիչ քաղաքականության մասին, ինչը հանգեցրեց 44-օրյա պատերազմին և Արցախի կորստին։
