Կեղծիքների և ստանդարտների խախտման փաստեր

OSCE/ODIHR, միջազգային դիտորդական առաքելությունը, որը գործարկվել էր 1996 թվականի սեպտեմբերի 22-ի ընտրությունների նկատմամբ դիտորդություն իրականացնելու նպատակով, արձանագրել էր բազմաթիվ խախտումներ. «դիտվել էին անհամապատասխանություններ ձայների հաշվման ժամանակ, չարտոնված անձանց կուտակումներ ընտրատեղամասերում, ընտրողների, ընտրատեղամասային հանձնաժողովների անդամների, թեկնածուների ներկայացուցիչների և միջազգային դիտորդների նկատմամբ սպառնալիքի դեպքեր. այս ամենը, ըստ առաքելության, «խաթարում է վստահությունը ողջ ընտրական գործընթացի ամբողջականության նկատմամբ»։

Ընտրություններից հետո Human Rights Watch (HRW) կազմակերպությունն իր զեկույցում նշել էր, որ բազմաթիվ խախտումներ, այդ թվում՝ կեղծիքներ, տեղի են ունեցել այն ընտրատեղամասերում, որտեղ միջազգային դիտորդներ չեն եղել. «ընտրացուցակներում հայտնվել էին մեռած հոգիներ և անչափահասներ, զինվորները քվեարկության էին գալիս սպաների ուղեկցությամբ, տեղ էին գտել քվեատուփերի լցոնման դեպքեր», որոշ տվյալներով՝ հարյուր հազարավոր քվեներ կարող էին կեղծվել։

ԱՄՆ Պետդեպարտամենտի մարդու իրավունքների 1996 թվականի զեկույցում նշվում էր, որ պաշտոնական արդյունքների հրապարակումից և բողոքի ցույցերի սկսվելուց հետո ձերբակալությունների ալիք սկսվեց. «Ընտրություններից հետո կառավարության կողմից ցույցերի ցրման ընթացքում իշխանությունները կամայականորեն ձերբակալել են տասնյակ մասնակիցների, շատերին ծեծի ենթարկել, խոչընդոտվում էր պաշտպանների և հարազատների տեսակցությունը ձերբակալվածներին», ինչը վկայում է ուժի կիրառման և հավաքների ազատության ճնշման մասին։