Պատարագ Փաշինյանի հետ՝ քահանաների ձերբակալությունների ֆոնին. ԶԼՄ-ներն Արամ քահանա Ասատրյանի դերակատարության մասին նոր հակաեկեղեցական գործում
16.10.2025. Armeniatoday.am-ը գրում է.
Թեև Հովհաննավանքի հոգևոր հովիվ Արամ քահանա Ասատրյանն ուղիղ ցուցմունքներ չի գրել Արագածոտնի թեմի ձերբակալված առաջնորդ Մկրտիչ եպիսկոպոս Պռոշյանի դեմ, սակայն ենթադրաբար «սևագիր» է տվել իրավապահներին թեմում Պռոշյանի և մյուս հոգևորականների դերակատարման մասին, հայտնում է «Ժողովուրդ» թերթը՝ վկայակոչելով իրավապահ մարմիների աղբյուրները: Թերթի տվյալներով՝ Պռոշյանն Ամենայն Հայոց կաթողիկոս Գարեգին II-ի քրոջ որդին է:
«Ասատրյանի «ձեռքով» գլխատելով Արագածոտնի թեմին՝ Նիկոլ Փաշինյանը մյուս շաբաթ կգնա Օշական` մասնակցելու Տեր Արամի պատարագին»,- նշում է թերթը:
Հոգևորականն արդեն հաստատել է, որ ինքն է վարչապետին հրավիրել պատարագի, որ հետո իր բնակիչները Փաշինյանին գյուղի վերաբերյալ հարցեր տալու հնարավորություն ունենան, պարզաբանում է մեդիառեսուրսը:
Արագածոտնի թեմի հոգևորականների ձերբակալությունների երկրորդ ալիքը սկսվել է քահանա Ասատրյանի հրապարակումներից հետո, ով պնդում էր, որ հոգևորականությանը ստիպել են 2021 թվականին մասնակցել ընդդիմության հանրահավաքներին։
Փաշինյանը հայտարարել է, որ աջակցում է այն հոգևորականներին, ովքեր բարձրաձայնում են ՀԱԵ ներսում առկա խնդիրների մասին: Ի պատասխան՝ սեպտեմբերի 17-ին Արագածոտնի թեմը կարգապահական նկատողություն է հայտարարել քահանային:
Հոկտեմբերի 15-ի առավոտյան հայտնի է դարձել Սաղմոսավանքի հոգևոր հովիվ Տեր Փառեն քահանա Առաքելյանի ձերբակալության, ինչպես նաև Արագածոտնի թեմի առաջնորդ Մկրտիչ եպիսկոպոս Պռոշյանի տանը խուզարկությունների մասին: Ավելի ուշ Պռոշյանը ձերբակալվել է:
Մայր Աթոռը դատապարտել է Արագածոտնի թեմի հոգևորականների ձերբակալությունները՝ այն անվանելով իշխանությունների կողմից Եկեղեցին վարկաբեկելու փորձ։ Մայր Աթոռը նաև հայտնել է 12 հոգևորականի բերման ենթարկելու մասին։ Քննչական կոմիտեն հաստատել է, որ կատարվում են գործողություններ՝ հավաքի մասնակցելուն հարկադրելու հատկանիշներով նախաձեռնված քրեական վարույթի շրջանակում։ Գործը հարուցվել է Տեր Արամի և «Իրազեկ քաղաքացիների միավորում» ՀԿ ղեկավար Դանիել Իոաննիսյանի հայտարարությունների հիման վրա:
Մայիսից ի վեր Փաշինյանը սուր քննադատության է ենթարկում ՀԱԵ ղեկավարությանը և կոչ անում գահընկեց անել Կաթողիկոսին: Հունիսին և հուլիսին նա մեղադրեց Էջմիածինը «հակաքրիստոնեական և հակապետական խմբի» կողմից զավթված լինելու մեջ։ Հունիսի վերջին ձերբակալվեցին արքեպիսկոպոսներ Բագրատ Գալստանյանը և Միքայել Աջապահյանը, որոնց նկատմամբ որպես խափանման միջոց ընտրվեց երկամսյա կալանքը: Ավելի ուշ կալանքի ժամկետը երկարաձգվեց: Ընդհանուր առմամբ իշխանությունը զավթելու փորձի գործով «Սրբազան պայքար» շարժման 15 կողմնակցի կալանավորելու միջնորդություն է ներկայացվել:
