Սերժ Սարգսյանը խոստացել է, որ Կարապետյանը կմնա ՀՀ վարչապետ 2017 թվականի ընտրություններում ՀՀԿ հաղթանակի դեպքում
26 նոյեմբերի 2016 թ․
Եթե իշխող Հանրապետական կուսակցությունն առաջիկա խորհրդարանական ընտրություններում մեծամասնություն ստանա, կառավարությունը կրկին կգլխավորի ներկայիս վարչապետ Կարեն Կարապետյանը: Այս մասին Երևանում ընթացող իշխող կուսակցության համագումարում հայտարարել է Հայաստանի նախագահ, Հայաստանի հանրապետական կուսակցության ղեկավար Սերժ Սարգսյանը։
Այսպիսով՝ Սարգսյանը տվեց ներքաղաքական օրակարգի կարևորագույն հարցերից մեկի պատասխանը, որն արդիական էր Կարեն Կարապետյանի՝ ՀՀ վարչապետի պաշտոնում նշանակվելուց ի վեր:
Նոր կառավարությունն իր գործողությունները ծրագրել է վեց ամսով, քանի որ 2017 թվականի ապրիլին Հայաստանում տեղի են ունենալու հերթական խորհրդարանական ընտրությունները, և երկրի ղեկավարի հայտարարությունից հետո պարզ է դառնում, որ նոր վարչապետի վստահության մանդատը ձգվելու է ևս մեկ տարով, երբ, նոր Սահմանադրության համաձայն, տեղի կունենա նախագահի փոփոխություն և անցում կառավարման խորհրդարանական մոդելի:
Իշխող կուսակցությանն անդամակցելու մտադրության մասին վարչապետը հայտնել է նոյեմբերի 24-ին կառավարության նիստում: Կարապետյանը հայտարարել է, որ նման որոշում է կայացրել առաջին հերթին այն պատճառով, որ կառավարության ղեկավարի պաշտոնին իրեն «հրավիրել է» նախագահ Սերժ Սարգսյանը: «Ցանկացած կառավարություն պետք է ունենա քաղաքական հենարան, և այս կառավարություն առաջին հերթին ՀՀԿ կառավարությունն է։ Ոմանք կարող են հարցնել, թե ինչու ես որպես հենարան ընտրեցի ՀՀԿ-ին, այլ ոչ թե ստեղծեցի նոր քաղաքական ուժ, ես կպատասխանեմ, որ դա արդարացված չէ։ Ունենալով Արցախի հիրմնահարց և մեր երկրի անվտանգությանն ուղղված սպառնալիքներ՝ մենք պետք է խուսափենք իրավիճակն ապակայունացնող զարգացումներից», — ասել նա։
